alas singko ng umaga nung nadapa siya sa arina. gumagawa sila noon ng hot pandesal nung maisipan niyang i-praktis yung black magic sipa sa loob ng panideria. dalawang araw din na namuti ang mukha niya.

alas tres ng hapon daw sila magkikita sa harap ng national bookstore sa araneta coliseum. kakain kasi sila sa 3M pizza bago manood ng pelikula ni FPJ sa coronet. matagal din siyang nakatayo roon at huminto lang siya sa paghintay nung kasing laki na ng bola ng jackstone yung binibilog niyang kulangot.

mayroon na yatong tatlong araw na silang nagbi-bingo. mainit ang ulo ni boyet dahil puro na lang siya puro pero hindi pa siya tumatama. huling laro na iyon nang sumigaw ang nambobola ng “sa letrang ENE – pumuputok!” tumingin si boyet sa card niya at sumagot ng “kwarentaysingko? BINGO!!!”

“HINDI”, ang sambit ng nagbobola, “trentayotso!”

bata pa siya ay gusto na niyang mag-aral mag torotot. nabigo ang pangarap niyang ito ng makagat ang dila at nalunok ang tatlong ngipin sa bagang nung gabing sinapak siya ni banay sa nguso. anim na buwan din siyang hindi nakapito.

madaling araw ng biyernes santo nang inihanda niya ang anim na hot pandesal at isang lata ng reno liver spread. sapat na raw itong baon para makalakad ng walang hinto simula talipapa hanggang sa grotto. yon ang payo sa kanya ni father allan. naisip niya kapagdaka na magbaon din ng bimpo.